Begiene, pestoors en auw wiever

De bisjop, de pestoors en de pestoor-daeke höbbe het gezag: niks dervan òm mèt de Vastelaovend es begien of pestoor verkleijd ròndj te loupe. Wae dat toch deit sjteit het eint en het angert te wachte. Boete de eeuwige sjtraofe, wiej de hèl en opnuuj gebaore waere es Hollenjer, is d'r ouch waereldliken dwank veurzeen. Vanaaf zaoterdig maoge de plisse jederein oppakke dae oetzuut wiej ein begien of eine pestoor en häöm of häör vashaute pès Esjelegoondsdig.

't Probleem is aevel dat eine plis neet direk kèn zeen of hae mèt echte of valsje geistelike te make haet. Daaròm haet te bisjop gesjreve dat de pestoors en de begiene ònger de karnaval baeter kònne bènneblieve. Mote ze toch nao boete, dan maoge zie zich verkleije es eine gewone minsj. Dus es geer in de vastelaovestied luuj taengekòmp, diej d'r gans gewoon oetzeen, maog geer d'r bekans zeker van zeen dat ge mèt ein verkleijde begien of eine verkleijde pestoor te doon höbt. Pas dus op mèt waat geer zègk! Het zaekerste is òm de manskaels allemaol mer mèt 'Meneer Pestoor' aan te sjpraeke en de vrouluuj mèt 'Masäör'.

De maotregele oet Remunj höbbe ouch al effek gehad biej de gemeintes. Het besjtuur waor d'er al lang op oet òm van de karnaval weer het serjeus fees te make dat het vreuger waor. Minstens aeve besjaaf es tee drènke biej de keuningin. In väöl gemeintes hink noe ein lies oet mèt vermòmminge diej neet meer maoge. Het geit hiej òm òngeveer 1500 gemeintelike funksies van hoog tot leeg. Sjtök veur sjtök van euverwirkde amtenaere, diej jeder jaor mèt de karnaval nao de wèntjersjport mote vlöchte òmdat ze de blammaasj van hun ambach op sjtraot neet kònne aanzeen.

Ouch de minderheidgroepe waere -wiej zich dat gehört- bezunjer besjermp. Wae zich es allochtoon of gekleurde Nederlander veurdeit, wurt hel aangepak. Den erm van de wèt is in diej zakes neet mals. Twee waeke gelaeje moos de foetbalmatch Fortuna-Ajax nog waere aafgelas òmdat de polissie van Zitterd de hauf ploog van Ajax houw vasgezat. Op het plissekentoor woorte de jònges ein hauf oer ònger d'n doesj gezat. Wiej dat neet hòlp kaom d'r nog eine sjoerbeusjtel en greun zeip aan te pas. Ouch daonao waore de deenders nog neet euvertuug van de echtigheid. "Es veer ze mèt Ariel Ultra op 80 graode wesje, dan kriege veer ze gegarandeerd sjoon", zag ein van de plisse-vrouluuj, diej toes ein hoeshauwe haet.

Oet de veurbeelde hiejbaove bliek het probleem van het nuuj mòmbakkes- en verkleijingsverbod: het is lestig òm de richtige en de naogemaakde oeterein te haute. Ònger drök van den almechtige bejaordebòndj oet de Baenje haet Zitterd noe ouch de auw wiever op de lies van de vebaoje vermòmminge gezat. Terech! Het gans jaor gaeve de vrouluuj kapitale oet òm er zo jònk meugelik oet te zeen en mèt de karnaval loupe dezelfde baanjels ròndj wiej aafgelebde mooswiever. Oet veurzörg waor dit jaor het auwwieverbal al aafgesjaf. Noe kump zòndig d'n optoch nog. De plisse höbbe opdrach òm alle auw wiever van de sjtraot te haole. En dao begint de zeiver weer: waat is een ech-aud-wief en waat is ei nep-aud-wief? En vanaaf wèlken auwerdòm begint de sjtatus 'aud wief'? 50+, 60+ of 75+? D'r zeen jòng plisse diej alle vrouluuj van baove de dartig auw wiever vènje. De nuuj gemeintewèt òp de auw wiever kèn dus nogal ruum ingesjat waere.

Veur auwer vrouluuj, diej toch nao d'n optoch wille gaon kieke, eine goje raod. Wilt geer geinen ozel höbbe mèt de plisse, verkleijt uch dan es jònk maedje!