Het verke in

het sjuurke

Oze 'transgene' sjtier 'Herman' haet de waeg geweze: bènnekort kònne veer beeste groottrèkke diej òs gratis organe gaon levere. Es get biej de minsj kepot geit is dat gein ramp. Zònger aafsjtotingsversjiensele kènt hae ei nuuj sjtök kriege van ei bees dat speciaal mèt zien gene is geïmplanteerd. Volges geleerde luuj eigent het verke zich het bèste veur dat gesjef. Het geliek het meiste op de minsj en minsjelike verkes zeen gemaekelik te haute.

Biej de verkesboer besjtèls-te dich ei bak. Leuts er dien DNA inzètte en kòns het mèt noe hoes numme òm het in dien sjuurke vèt te maste. Neet veur de 'spare ribs' mer veur de 'spare parts', de òngerdeile dus. Veur het geval dat diene wèkker begint te rammele of dat dien lònge en diene laever al nao het kirkhef wille en dich nog neet. Hoofs dan neet meer te wachte tot eine mèt ein donorcodicil zich taenge eine paol doodveurt. Kòns alles van dien eige verke kriege.

De baas haet noe zien eige remedie veur de ònsjterfelikheid: zien eige verke in het sjuurke. Het verke deit zich good op. Het haet ouch ei bitje den aard van ziene baas: het is luij en het is lestig es het aete neet op tied kump. Het kik ouch sòms mèt krallige uigskes nao de vrouw van de baas. Diej zaet: "Sjeng, het verke aamp precies nao dich." En dao wurt ins good òm gelache. Pès dat op eine mörge het verke begint te kalle en te vloke. Krek wiej ziene baas. Geleerde van de universiteit kòmme kieke. "Jao", zègke diej, "ei minsjelik verke of ei verke van eine minsj. In de weitesjap kòns-te noots van aanvangs aan zègke wo het eint begint en het angert oetsjeijt".

Het verke van Sjeng wurt altied mer sjlummer en lestiger. Het moot vanalles höbbe. Taenge het ènj van het jaor haet het al tillevisie in het sjuurke. 's Mörges zit het te knaotere es de gezèt neet op tied is. Sjeng löp zich de bein ònger de vot oet òm ziej verke mèt alles en nog get te verzeen. Zien vrouw zaet: "Noe zuus-te ouch ins waat ich altied veur dich höb mote doon." Het verke van Sjeng haet ein fien naas en eine goje sjmaak. Verkesvoor vrit het neet meer. Het leefs haet het bufsjtök mèt fritte en ein flesj Bordeaux. En biej de cognac rouk het zich gaer ei sigaerke.

Het verke wurt te vèt en den hoesdokter moot kòmme. Want mèt de veterenaer wiltj het verke niks vandoon höbbe. "Teväöl cholesterol", zaet den dokter, "en de laever ram kepot van het zoepe. Es het verke neet rap einen donor veur ein nuuj laever vundj, is het bènnekort ripsj." Het verke kik ins sjuins nao Sjeng. De baas wurt bleik. "Dachs toch zeker neet...?" "Jao", zaet het verke, "ich höb aeveväöl rechte es dich. Dae het eers get neudig haet, is het eers aan de riej..."