Kultuurklöppele

Luuj, diej noe tachtig jaor zeen, höbbe het weer aan hun bein: veur de veerde keer in hun laeve mote opa en oma zich ein nuuj Nederlandse sjpelling gaon lere. Raar mer waor: opa en oma zeen vreuger ouch nao sjool gewaes. De meister leerde hun dao leze en sjrieve mèt de sjpelling van De Vries en te Winkel oet 1883. Wiej opa in 1935 zien eerste leefdesbreve begos te sjrieve, heije ze häöm weer biej de peut mèt de nuuj sjpelling van minister Marchant. Toch geraakde opa en oma getrouwd. Ze kaome same den aorlog door, en toen waor het weer raak: weer ein nuuj sjpelling en het greun beukske van 1954. De res wèt geer zelf: saer 1995 is er weer ein nuuj sjpelling, ouch nog mèt väöl nuuj weurd. Opa en oma waere d'r ei bitje meug van. Mer dat is hun eige sjout: auw luuj mote mer neet zo auwerwètsig wiej luuj van hunnen auwerdòm in Frankriek en Ingelandj. Diej sjrieve dao nog altied wiej hònderd jaor geleje. Nao het sjient waere in diej achtergebleve lenj ouch nog beuk en gezètte in diej audvraensje sjpelling gedrök!

Opa en oma zeen ouch nog taengedraods. Ze blieve dialek moele, terwiel diej röksjtendige sjpraok toch verbaoje is. Want auw tale zeen sjlech veur de gezòndjheid. Opa wurt sjtilaan douf òmdat hae teväöl nao het Limburgs haet geloesterd. Oma zuut neet good meer òmdat zie teväöl nao het Limburgs haet gekeke. En de tenj valle hun oet òmdat ze teväöl Limburgs gekald höbbe. Het plat dat kòs einen houp geldj aan de krankekasse! Gaef òs mer ein frisje 'trendy' kultuurtaal, wiej het Nederlands. Ein taal diej biej d'n tied is, en veur alle nuuj begrippe ein eige fenistig en fiengeveulig woord haet, wiej 'bullshit', 'interview', 'vocabulaire'.

Nujerwètse sjrievers, journaliste en sjpellingsverbaeteraers höbbe hunnen dreij gevònje òm van hun taal ein kaolike, besjmèttelike krenkde te make. Wiej wurm en maje kroepe de Ingelse weurd in hun gesjrifte ròndj. Sòms dènk ich dat väöl sjrievers te luij, te greutsj en te kaal zeen òm gewoon weurd te gebroeke.

"Och", zag de sjriever, "ich sjrief ouch neet veur kultuurklöppele, wiej opa en oma. Ich sjrief veur intellektuele. Veur sjlum en gesjtudeerde luuj, diej lang genòg nao sjool zeen gewaes òm mich te versjtaon. Wae zien taal neet kènt, moot mer nao d'n tillevisie kieke."

Oma kik nao alle Nederlandse oetzendinge: All you need is love, Soundmix show, Surprise show, Blind date, Playback show, Jules unlimited, Telekids, Talkshow, Personality Show, Honeymoon Quiz...

Opa zaet: "Höbs-te noe weer einen Ingelse zender opsjtaon?"

Sjtòm luuj... nao sjool gewaes en nog gei Nederlands versjtaon!