Lestige luuj

De luuj zeen lestig, òndankbaar en kort van ònthaud. Es teen jaor geleje einen Iljoesjin-bòmmewerper baove Gelaen waor kòmme vlege, zouwe ze van de sjrik in de kelder zeen gekraope. Noe belle ze kaod nao het vleegveldj van Baek òm te vraoge of het neet mèt get minder laweit kèn. Ze wille mer neet begriepe dat zie zelf de sjout van hun eige òngemaak zeen. Jedere normale minsj haet genòg bezeij van laevesbehaud en sjtuk zich eweg biej gevaor oet de loch. Op de klachtelien van Baek waere ze d'r meug van òm ummer aan de luuj oet te lègke dat ze in hunne kelder väöl minder las höbbe van het laweit en dat eine Rus in de loch nog altied baeter is es eine Rus in dien keuke.

Trouwes, höbbe ze d'r in Baek al ins aan gedach, òm al diej klagers air-miles kedoo te doon?

De luuj zeen ouch vergaete dat hun gemeinte altied het bèste mèt hun veurhaet. Num noe den aanlèk van ei miljeupark. Es de gemeinte ze bliej wiltj make mèt ei miljeupark veur hun deur, beginne ze al te grauwele. Terwiel ei miljeupark (de naam zaet het al!) toch ein van de sjoonste zaengeninge van de modernen tied is. Wae geit neet gaer wenjele in ei miljeupark, wiej dat van Sjinne? Dezelfde luuj, diej taenge het miljeupark zeen, loupe waal altied te rope veur meer miljeu en meer park. Dan kriege ze het van B&W allebeij tesame, en dan is het weer neet good!

De luuj weite neet waat good veur hun is. Drie super-mega-gemeintes in Zuid-Limburg: giga-Mesjtreech, mega-Haelder en super-Zitterd. Wiej einen hamburger van Mc Donalds moot jeder boeregaat taenge het jaor 2000 verpak waere in ei superlatief. Dörpkes, diejs-te noe neet ins zuus ligke es er ein koo veur sjteit, zeen dan deil van ein grote metropool. Auw luuj zulle nog waal get gròmmele, mer veur de jeug is het ein bevriejing. Wèlk maedje dörf noe helop te zègke dat het mèt eine jòng oet Pöth vriejt? Wo blief dae koffieshop in Klömme? Wienee wurt de sjtasie van Voelender aafgebraoke, zodat de luuj èntjeliks d'n trein kònne pakke in een sjtasie diej biej d'n tied is: diej van Haelder, bieveurbeeldj. In diej grote gemeintes krieg ouch de industrie de plaatsj diej ze verdeend. Vreuger laog de kirk in de midde. In Zitterd 2000, mèt Sjtein, Bor, Baek en Gelaen lik DSM in de midde. Wae zag vreuger ouch alweer dat industrie en bedrieve aan de randj mooste ligke?

De luuj höbbe gein visie. Veuroetgank en gelök is allein mer meugelik es alles gans groot is. Ei mega-krankenhoes, wo ze emes ei bein aafzaege in de plaats van zien amandele te knippe (het sjtòng toch op het breefke biej dae nummer!). Sjole mèt 2000 kènjer (mer allemaol individueel begeleid!). Beurtnummerkes trèkke op het sjtadhoes (d'r zeen nog 200 wachtende veur uch!). En taenge 2010 ei groot Limburgs bejaordetehoes in de Peel, wo ze alle produkte van de gebaortegolf van nao den aorlog biejein kònne zètte. Inclusief de börgemeisters, diej dat noe allemaol bedènke.