Luij Limburgse vot

Einen aolifant en ein mögk sjleipe allein hun eige gewich mèt. De minsj, dae is al vreug begòs van alles mèt te sjörge. Wiej het te zjwaor woort maakde hae zich ein kar. Daonao maakde hae ei paerd of einen aezel zo gek òm diej kar te trèkke. En hae ging d'r mèt zien luij vot op zitte. Mèt d'n auto is de luij minsjevot pas ech gedeend. Meer es 1000 kilo sjtaol wurt in bewaeging gezat òm 70 kilo minsjevleisj van puntj A nao puntj B te brènge. En ouch weer trök. Want de minsj verdeit ziej laeve mèt van zien hoes nao ziej wirk en van ziej wirk nao zien hoes te gaze.

Dat moot ouch nog rap gaon. Want waat zaet het ministerie van Ekonomische Zakes? Miljarde göljes sjaaj in Nederlandj es gevolg van de files op de waeg! Wiej ze het beraekene weit ich neet. Ich num aan dat ze eine wirkeloze in zien aud Kadetje get minder tèlle es d'n direkteur in ziene zjwaore Mercedes. Auto en direkteur tikke dao toch al rap 250 gölje per oer. Bedrieve met väöl direkteure höbbe dan ouch de grootste sjtröp aan de files. Diej ligke sòms oere plat òmdat de ganse direksie op d'n autowaeg sjteit.

D'r mote dus väöl meer waeg kòmme. En langs diej waeg zètte ze dan grote plakkate mèt goje raod, wo ze toch niks van meine: "Num den trein", "Laot d'n auto sjtaon", "Fitse is gezòndj".

Het is nog altied e raodsel, waoròm de luuj zich van dae sjone reklaam niks aantrèkke. Zeker neet in het sjoon Limburgs landj. De Limburgers sjiene d'r geine sjpas aan te höbbe òm jederen daag mèt het fitske de Keutenberg, de Cauberg of de Wèndjraak op te peddele.

In Mesjtreech höbbe ze oetgezeuk dat het autogebruuk in Limburg helder veuroetgeit es in de res van het landj. Op teen jaor tied zeen d'r meer es 115.000 auto's, bösse en vrachwagels biejgekòmme.

Ròndj dezen tied zitte veer hiej al op een hauf miljoon sjtöks.

Op het Belsj höbbe ze oetgecieferd dat dao van noe pès 2010 nog ins 40 percent auto's gaon biejkòmme. Es de Limburgers de Belsje naodoon sjtaon veer in Limburg dan met 900.000 motorwagels op de waeg. "Sjtaon" is hiej het good woord, òmdat het ènsigste sjtökske waeg dats-te dan nog kèns vare de opvaart van dien graasj pès tot aan de sjtraot is.

Noe is het nog ei gelök biej ein òngelök dat de Hollenjers zich nog neet kòmme meuje mèt de Limburgse autogekkerie. In Den Haag meine ze nog dat veer op het water en neet op de waeg 'vare'. Zolang es het doert sjtaon veer dao mèt òs auto's nog in de sjtatistieke van de bènnesjeepvaart.

Het naodeil is natuurlik dat veer daomèt riskere dat ze òs het Julianakanaal gaon verbreije in de plaats van eine nuje waeg te make. Vreug of laat mote we hun toch ins gaon oetlègke dat veer hiej eigentlik 'dreug' vare. Behauve ei paar oetzunjeringe diej zich mèt hunne zate kop in het kanaal of in de Maas vare.