Oos Naobers

Veer Limburgers zitte d'r toch mer sjlech mèt geportretteerd. Lènks, rechs, baove en ònger höbbe veer mèt vraem naobers.

Aan den eine kantj nötte Pruse, aan den angere kantj sjtòm Belsje, ònger luij Wale en baove -'t ergste van al- sjael Hollenjers. Ómdat veer zelf zo'n leef luuj zeen, höbbe veer òs ein gans good en richtig gedach kònne make van de naoberluuj. Want de minsjekènnis is òs mèt de mem en de lòtsj ingegaeve. Al woveur eine psychiater ach jaor moot lere dat weite veer mèt sumpel nao eine minsje te kieke.

In diej meining euver oos naobers sjtik ouch ei bitje het bezeij dat veer van òs eige höbbe:

- veer douge ouch neet, mer zeen wenigstes neet zo nöt wiej de Pruse

- veer zeen ouch neet sjlum mer ouch weer neet zo sjtòm wiej de Belsje

- veer zeen ouch luij mer zeker neet zo voel wiej eine Waal

- het woord 'sjaelen Hollenjer' gebroeke veer òmdat veer biej diej luuj zoväöl faelders en gebraeke vènje, dat het neet meer te doon is òm die ein veur ein op te neume.

Mèt diej Hollènjers zitte veer eigentlik nog het meiste opgesjeep. Den Hollènjer veurt ròndj mèt dezelfde plaat op zienen auto en es hae zien mòndj toehiltj höbs-te sòms gaaroet neet gesjaote dats-te mèt einen Hollenjer te doon höbs. Veur de richtige Limburger is dat laevesgeveerlik. 't Is es went menkes van ein vraem planeet zich hiej òngemirk tösje de eigenheimers kòmme misje en sjtillekes op hun zök de sjoon pezieses in Sjengelandj euvernumme. Veur dats-te het wèts zits-te mèt einen Hollenjer es börgemeister of goeverneur!

Van eine Pruus of van eine Belsj wèts-te altied dat dae vreug of laat weer nao hoes geit. Mèt eine Pruus kèn dat waal al ins get langer doere, mer den Hollenjer dae blief hiej zitte. 't Ergste zeen diej Hollenjers diej ouch nog zègke dat ze gaer in Limburg wone en dat de luuj hiej zo vruntjelik zeen.

Dat is ei richtig affrònt veur òs. Veer wille gaaroet neet vruntjelik zeen, want òngerein zeen veer dat ouch neet.

Es veer neet tösje al diej vraem naobers zote zouwe we òs òngerein gaer de köp inhouwe. Gelökkig höbbe veer al dat gesims òm òs haer wo-aan veer òs kènne sjpegele es het òs òngerein ei bitje sjlech wurt. En dan veule v'r òs weer ei volk. Want ouch de grootste batteraaf vundj van zien eige dat hae zelf nog ei kemmunieprèntje is in vergelieking mèt einen angere. Daoròm koke lènj, völker, sjtaej en dörper aanein. 'Identiteit' heisj dat. En eigentlik haet dae sjtolz nörges einen echte gròndj. Mer het is good dat lenj, stjaej of dörper zich òngerein wiej hinne pikke. Zolang es het biej pikke blief höbs-te geinen aorlog in den hinnesjtal. Want es te ein hin of ei kuke eine sjpegel veur de kop zèts, pikke ze ouch nao dae sjpegel...