Foetbal

Het is gelökkig weer euver. Ich waor zo kòntent dat Seedorf dae penantie taenge de Franse kipper sjtampde. Daomèt waore veer hiej weer veur twee jaor van de oranje-gekkeriej verlos. Jedes keer mèt ein Europees of waereldkampejoensjap kump dat weer trök: oranje hiej, oranje dao. Ouch de Limburgers sjildere zich dan in de kleur van de protestante, de kleur van de geuzepestoors. Ei paar hònderd jaor gelaeje kòs eine kattelieke sjöt zich hiej nog den hemel verdene mèt op protestante te jage. Noe sjete de sjötte allein nog mer op bölkes of op eine pepiere vogel. Jaomer toch dat sjoon gebroeke zo rap verlaore gaon!

Noe veer toch baezig zeen het Limburgs es taal aanerkènd te kriege, mote v'r ouch mer tegeliekertied ein aanvraog biej de FIFA indene om van Sjengelandj ein apaart foetballandj te make. De Kroate, de Tsjekke, de Sjotte en de Iere doon ouch apaart mèt. Woveur moge veer dan neet mètdoon? Veer Limburgers zeen de ènsigste diej de foetbal in häör sjoon Ingelse tradisie höbbe bewaard. Veer höbbe d'r geine "voetbal" of "Fußball" van gemaak. Biej òs sjteit toch nog altied eine kipper in de gaol en geinen "doelman" of "Torwart". Ein gaol dat is hiej ein gool en gei "doelpunt" of "Tor". Eine centerveur sjteit hiej afseit en neet "buitenspel". Veer sjtampe penanties en gein "strafschoppen". "Hens" zègke veer veur "handspel". Ein "overtreding" is biej òs "fool". Es twee ploge van naoberdörpe zich òngerein taenge de knäök kòmme sjtampe, dan is dat einen "derbie".

Veer gaon òs mèt zo'n nasjonaal Limburgse ploog ouch weer get probleme op de nak haole. Ten eerste: wae maog mètdoon? Daoveur moos-te ei good bewies van Limburgersjap kònne veurlègke. Eine pap, dae oots in de ploog van de koel haet gesjpeeld, is neet genòg. Op de foetbalpleine van de koele lepe vreuger meer Pole en Italjaenders ròndj es richtige Limburgers. Diej kòste dan waal baeter foetballe òmdat ze neet zo luij, laam en lansem waore wiej de Limburgers, diej al meug woorte van hun eige sjeenlep mèt te sjleipe. Es veer ein eige nasjonaal Limburgse ploog opsjtèlle, dan moot diej ouch volbloods Limburgs zeen. Dat diej ploog ze euveral gerete geit kriege is neet erg. Veer gaeve toch altied emes angers de sjout. In de foetbal is dat gemaekelik: dao krig den arbieter ze altied euver de rubbe.

Blif de vraog: wo haole veer 11 richtige Limburgse foetballers vandan? Veer zouwe de dialekvereiniging Veldeke kònne insjakele. Diej zeen waal ech Limburgs, mer de gemiddelden auwerdòm lik dao ròndj de 65 jaor. Veur dialektologe en vreigelaers is dat nog jònk, mer op ei foetbalplein zuus-te dan het graas nog helder veuroetgaon es de ploog. Anger meugelikheid is örges eine raod van èlf oet te haole en diej op te sjtèlle. Dan höbs-te in jeder geval ein populair ploog mèt het naodeil dat diej meer verstandj höbbe van ei prinsebal es van foetbal.

Lètste meugelikheid is natuurlik te doon waat veer het bèste kènne: namentlik gaaroet niks. En sjtilaan beginne mèt te supportere veur de "Mannschaft".

Aj, dat waor ein taenge de (oranje) Hollese sjene...