FC Limburg

Es het eròm te doon is de Limburgse Volkskultuur oet te drage is de provincie gein meujte te min. Num noe òs sjoon foetbalkultuur. Dat allemaol good gemeind, mer dao geit väöl te min richtige oetsjtraoling van oet. Dao wurt waal ins einen trein aafgebraoke. Op verplaatsing waere get roete van eine petik of eine kefee ingegoojd. In brevebösse pisse, de bös òngersjpieje, anger luuj laam make mèt zatigheid en sjaele wauwel: het is allemaol väöl te klein van aanpak, òm dao ech eine goje Limburgse naam mèt te make. Daags d'rop sjteit dan mer ei klein artikel in ein plaatsjelike gezèt: "Supporters Roda maken herrie in binnenstad", "Harde kern MVV maakt stennis", enzowiejer. Meistes zètte ze neet ins derbiej dat het Limburgers zeen. Op diej meneer kriege ouch de bèste supporters er de mismood in. Liks dich dao te plaoge òm ein tribuun aaf te braeke, en kumps neet ins op den tillevisie. Diej klein pleugskes mèt hun beheijmaekers mote dus fusere in een grote ploog: FC Limburg.

De veurzitters van de Limburgse ploge zeen mèt de goeverneur gaon kalle en höbbe häöm gevraog òm veur de kòmmende jaore het subsidieverke ins op hun leijer te hange. D'r is òngertösje genòg geldj verknoojd aan museums, sjole en bokerieje. Het is wiej de veurzitter van Roda het aan de goeverneur haet oetgelag: "Es de bibliotheek van Kirchraoj aeveväöl lede haet, es veer supporters, maoge ze weer euver kultuur kòmme mètkalle. Noe mote ze zjwiege." Hae zag dat Roda vreuger al dèks genòg aan de bibliotheek heij gevraog òm get meer zjwaor beuk mèt eine sjtieve kaf op het sjelf te zètte. Dan koste de supporters dao misjiens nog get mèt doon. Probeer mer ins mèt ei pocketbeukske ein roet in te goje of eine richtig te watsje. Dat vònje de anger veurzitters ouch en ze beklaagde zich biej de goeverneur euver de mangel aan mitwirking van de provincie en de gemeintes. "Het is eur sjout dat òs jònges lever eine brik höbbe es ei book", zagte ze. Daonao eksplikeerde ze häöm dat allein Winkler Prins en de Grote van Dale mèt eine brik te vergelieke zeen. Diej beuk zeen aevel väöl te duur in het gebroek veur de gemiddelde supporter. De kataloog van de Wehkamp is dik genòg, mer te sjlap. Mèt ei tillefoonbook kòns-te waal ein mök kepothouwe, mer geine supporter van Den Haag. Mèt anger weurd: in de gojekoupe beuk is er neet väöl dat de richtige foetballeefhöbber deenstig is. Dao zal de provincie mèt subsidies mote biejsprènge.

Ein belaeze en gelètterde foetbalvereiniging moot natuurlik ouch ein eige kultuurpaleis höbbe. De foetbalbaronne heije zich daoväör ei groot sjtadion gedach, get wiej het Colloseum in Rome, mèt ei daak dats-te kòns toesjuve es het raengert. De bal of het graas zouwe waal ins naat kònne waere! Wo geit dae kultuurtempel kòmme? In Limburg is neet väöl plaatsj meer. Het veurstjèl van Roda òm Rolduc aaf te braeke, vònje de angere waal good. Allein lik Kirchraoj es kultuursjtad get wied oet de sjlaag. Ouch in Mesjtreech zouw gojekoup plaatsj gemaak kònne waere, es ze get supporters van MVV mèt eine riethamer op het Bònnefantemuseum loslete. Diej van Zitterd zagte dat ziej eigentlik al alle geboewe van waerde houwe platgelag. Allein de Paterskirk en het Begieneklooster waore nog euver. Mer dao gònge ze appartemente op zètte. Noe is aafgespraoke dat ze op de volgende vergadering ein lies van de besjermde monumente gaon mètnumme. "Dan zeet geer in eine keer ouch van daen auwe kraom aaf", zagte de foetbalveurzitters taenge de goeverneur.