Erm en Riek

Maog einen erme ei brood sjtaele? Bisjop Muskens meint van waal. "Neij", zaet Wim Kok, "einen erme maog zich geine wèk klauwe. De bisjop moot ins baeter zien teen gebaoje naolaeze. Waat sjteit dao in het zevende?"

Zo sjteit eine paarse bisjop mèt mer neuge gebaoje taenge ei paars kabinet mèt 248.000 gebaoje. En ze make d'r nog jederen daag biej!

Het gebäört neet jederen daag dat eine sosjalis zich mèt geluifskwesties geit meuje. Wo is den tied dat de kirk door de sosjaliste woort gezeen es ein van de aansjtaekers van den ermooj in de welt? Noe is het angesjeròm: de kirk pak het op veur de zjwake en eine sosjalis dae reup: "Wo meujt geer uch mèt? Höb geer nog noots van de wèt op winkeldeefsjtal geheurd?". Dao is presies get aan het versjuve in de auw taengestèlling tösje riek en erm. Vreuger waor het de kirk diej het good meinde, mer het verkeerd deeg. Noe zeen het de politiekers dae het good meine... of zich get meine, of van hun eige meine dat ziej het landj van mèlk en honing biej de luuj gebrach höbbe.

Wieväöl breuj kòns-te bakke van ein rejaal oprotpremie veur einen amtenaar dae neet voldeit? Wieväöl wègke kòns-te koupe van de commissariate van Frits Bolkestein? Maog ein gemeinte mèt häör eige sjtòmmiteite ei paar tòn in de baek sjmiete, mer taenge einen ermoodspungel zègke dat het zien eige sjout is?

Het moelegevech tösje Kok en de bisjop haet weer ins oetgebrach dat het versjil tösje erm en riek eigentlik niks mèt het geldj of rechjaopenheid te make haet, mer mèt de mach. Wae de mach haet, maog besjlisse wo het sjeid lik tösje erm, dooderm, sjtraoterm, sjebbetig en eelenjig. Zònger dat hae richtig het bezeij dervan haet, zaet Kok presies waat oetbuiters en mechtige kesteelhere häöm door de eeuwe haer veurgezag höbbe: "Luuj geer moot neet klage dat geer erm zeet. Geer moot beröste en veural niks doon waat taenge de regels geit." En daomèt wurt den ermood toegedèk in de rare welt van de sjtatistieke. Probeer mer ins oet de gevangenis van de sjtatistiek te kòmme! Es ei persent het sjlech haet en 99 persent het good, dan is dao de sjtatistiek, es nuuj evangelie, òm dat ei persentje ònger de mat de vaege.

Es-te allein mer nao de ciefers kiks, dan is de welt altied mèt plenk toegenaegeld. Es emes zaet dat erm in Nederland nog altied baeter is es erm in Afrika, dan luug hae zich waat hae zich baejt. Den ermen Afrikaan zuut neet op jederen hook van de sjtraot ei groot plakkaat, dat häöm de ouge oetsjtik mèt koupwaar diej hae zich toch noots kèn aansjaffe. Den ermen Afrikaan is same mèt 99 persent anger Afrikane in den eigesten eelenjskraom gelogeerd. Neet, dats-te dao baeter van wurs, mer höbs in jeder geval, veur dien eige, de euvertuging dat het neet allein aan dien eige kan ligke.

Vreuger waor dat hiej ouch zo: ei paar luuj sjatriek en de res dooderm. Noe is het misjiens ei bitje òmgedreijd: einen houp luuj diej het good geit en ein minderheid diej achterblif. Mer dat beteikent waal dat diej sugkelaers jederen daag, euveral en van jederein, de sjpegel van hun òngelök en hun mislökking kriege veurgehaute. En dat is get waat Wim Kok in zien kirk ouch neet rech kan kalle...