Eurocente

Ze heije in Europa hun geldjkwestie sumpel kònne oplosse. Ze heije daoveur neet de norm van Mesjtreech mer de norm van Venlo mote toepasse. In Venlo kieke ze dich sjeif aan es te mèt göljes in de plaats van mèt marke wils betale. Ze hauwe het breefke dan ins good taenge het leech en vraoge ofs-te "keine andere Scheine" höbs. Es ze kòste tèlde ze dich ouch nog 15 persent baovenop de pries, want Venlo is de sjtad wo diene Mark eine Gölje waerd is, en neet angesjeròm. Es we het dus einfach heije wille haute, heije we van de Prusemark den algemeinen Europese munt mote make. Prusemarke kènne ze euveral. Mer, òmdat de Prusemark ouch samehink mèt diej verrekde Pruse, höbbe ze in sòmmige lenj versjrikkelik de rap aan dat geldj. Zo zal eine richtigen Hollenjer noots ei breefjke van hònderd mark van de sjtraot oprape. Hae viltj nog lever kepot. En dus moos er in het vereinigde Europa, wo de naoberluuj zich òngerein zo good versjtaon, nuuj geldj kòmme: den Euro.

Euro, homo, hetero, disco, porno, acceptgiro, toko, A-so...Weurd diej op ein 'o' eindige zeen neet de sjoonste in de Nederlandse taal. Den Euro sjteit ouch ei bitje bleik te kieke in het rieke van de geldjname. Name van geld zeen heel aud. Dukate, florijne, penninge, frengskes gaon allemaol hònderde jaore trök in den tied. En dan kump doa noe inèns en nörges vandan den Euro, òmgeraekend 2,16 gölje, en dae wurt door de politiekers den hemel in gepries es het geldj dat altied zien waerde geit behaute. Waat nog noots eine vaerdig haet gekrege, geit mèt den Euro lökke. Euro's kòns-te in eine zok ònger diej bèd sjtaeke. Es-te ze teen jaor later d'ròngeroet haols, zeen ze nog altied aeveväöl waerd. Euveral en in alle lenj...

Dat wille we nog ins zeen, want ze höbbe op de breefkes van den Euro ei bitje plaats gelaote wo jeder landj nog zienen eige keuning of keuningin op kèn zètte. Ouch weer neet teväöl plaatsj, òmdat ze sjoew waore dat de Pruse der ein panoramafoto van Kohl op zouwe zètte. Dao begint natuurlik het gezeiver. Es dich eine Belsj einen Euro mèt keuning Albaer in de henj duujt, is dae dan hetzelfde waerd es eine mèt Beatrix? En waat deis-te mèt einen Italjaansen Euro? Höbs kans dat ze dich in Venlo eers nao de bank sjikke òm te gaon wissele!

Och, zagte de ministers in Dublin, den Euro is zo gemaak dat de luuj dao zònger probleme mèt òm kònne gaon. Het zal òs benuje, want veer höbbe noe einmaol de geweunde òm alle pries zo gojekoup oet te raekene dat ze altied op -,95 of -,99 oetkòmme. Ei bitje kòmmersant kan uch al oetraekene nao wèlke kantj diej 0,99 Eurocent (toch nog altied 2,14 gölje!) geit versjuve. En dan kalle veer neet ins meer euver diej erm Italjane en Spanjaarde, diej gaaroet neet meer achter ein komma kònne raekene. Einen Euro is pakweg 1900 Lire. Op de sjole in Italië zulle ze nog rap nuuj lèsse wiskunde mote gaeve òm de Italjane van hun knepkesgeldj nao den Euro op te sjakele.

In Frankriek woort 27 jaor gelaeje de Franse frang opgewaardeerd. Noe nog zeen dao luuj, diej nog altied in Anciens Francs raekene. Geldgeweundes zeen dus sjterker es het geldj zelf. Daoròm weite veer noe al wiej ze in 2002 in Venlo gaon raekene: einen Euro? Dat is twee Mark.